ངོ་སྤྲོད་མདོར་བསྡུས་

རུས་མིང་ལྟར་མཚེ་ཁྲ་སྐལ་བཟང་རྒྱ་མཚོ་འབོད། ཡང་ན་སྐལ་རྒྱམ་ཡང་ཟེར། ཕ་ཡུལ་ཨ་མདོ་རྨ་ཆུའི་དཔལ་བན་ཚང་གི་འབྲོག་པས་ཁྱིམ་ཚང་དཀྱུས་མ་ཞིག་ནས་འཚར་ལོངས་བྱུང་། ཀན་སུའུ་ཞིང་ཆེན་སྒྱུ་རྩལ་ཆེད་གཉེར་སློབ་གྲྭར་ནས་བོད་ཀྱི་ཞབས་བྲོ་འཁྲབ་མཁན་གྲགས་ཅན་ཡི་དམ་སྐྱིད་ཀྱིས་བོད་རང་གི་ཞབས་བྲོའི་ཁྱད་ཆོས་གཞིར་བཟུང་ནས་མདོ་དབུས་ཁམས་ཀྱི་འཁྲབ་སྟངས་ཁྲིད་སྦྱངས་བྱས། སློབ་མཐར་ཕྱིན་རྗེས་ཀན་ལྷོ་ཁུལ་ཟློས་གར་ཚོགས་པའི་ནང་ལོ་ངོ་བཅུ་ལྷག་གི་རིང་བྱ་བ་ལས་ནས་སི་ཁྲོན་དང་མཚོ་སྔོན་ཀན་སུའུ། གཞན་རྒྱ་ནང་གི་ཞིང་ཆེན་སོ་སོ་དང་ལྷོ་ཀོ་རི་ཡ་སོགས་ནས་འཁྲབ་སྟོན་བརྒྱ་ཕྲག་བརྒལ་བ་བྱས།  ༩༥ ལོར་སྒྲ་ཐག་"ཨ་མདོའི་བུ་མོ་" དང་"ཀན་ལྷོའི་དཔྱིད་དཔལ་" ཟེར་བའི་སྟོད་ཆ་དང་སྨད་ཆ་གཉིས་གླུ་བ་ལྔའི་སྒྲ་བླངས་ནས་མདོ་དབུས་ཁམས་གསུམ་དུ་བཀྲམ། ༩༨ ལོར་ནུབ་བྱང་མི་རིགས་སློབ་ཆེན་ནས་སྐད་བརྡ་རིགས་པ་དང་རྩོམ་རིགས་སློབ་མཐར་ཕྱིན། ༢༠༠༢ ལོ་ནས་བཟུང་པེ་ཅིན་དང་ལན་ཀྲུའུ་སློབ་གྲྭ་ཆེན་མོ་སོགས་ནས་དབྱིན་ཡིག་དང་རྩིས་འཕྲུལ་སོགས་ལོ་བཞིའི་རིང་སྦྱངས། ༢༠༠༥ ལོའི་ཟླ་༨ པར་ཆུང་མ་བྱ་ཁྱུང་སྐྱིད་དང་མཉམ་དུ་ཕ་ཡུལ་རྨ་ཆུའི་དཔལ་བན་ཚང་ནས་འགོ་བཙུགས་ཏེ་རྐང་ཐང་ལ་ཁྲོ་སྐྱབས་ཐུགས་རྗེ་ཆེན་པོ་དང་དེ་ནས་རིམ་བཞིན་སྔོན་གྱི་དབུས་ལམ་བརྒྱུད་དེ་ལྷ་སར་ཟླ་བ་གསུམ་རིང་དབུས་མཇལ་སོང་།  ༢༠༠༧ ལོར་ཨ་རི་ལ་ཡོང་ནས་ཆུང་མའི་ཕ་ཡུལ་ Washington State ནས་བཅའ་སྡོད་བྱས། ལོ་དེར་ས་གནས་གླུ་བའི་འགྲན་སྡུར་ཞུགས་ནས་ཨང་དང་པོར་འདེམས་ཏེ་བྱ་དགའ་ཨ་སྒོར་ཁྲི་གསུམ་ཐོབ། Lopez Artist Advance དང་ས་གནས་སྒྱུ་རྩལ་པ་ཚོའི་རྒྱབ་སྐྱོར་འོག་ཆེད་བསྒྲིགས་འཁོར་ཐག་"གནས་མཇལ་བ། Pilgrimage"ཟེར་བ་སྒྲ་བླངས་ནས་འགྲེམ་སྤེལ་བྱས། ཚིག་དང་དབྱངས་ཕལ་ཆེ་བ་རང་གིས་བརྩམས། ༢༠༠༨ ལོའི་ཟླ་༩ བར་ Los Angeles ནས་ཚོགས་པའི་རྒྱལ་སྤྱིའི་རོལ་དབྱངས་དུས་སྟོན་སྟེང་གདན་ཞུ་བྱས། དེ་ནི་ World Festival of Sacred Music ཟེར། ༢༠༠༩ ལོར་ The Just Plain Folks Music Awards ཟེར་བའི་རྒྱལ་སྤྱིའི་གཞས་པའི་འགྲན་ཚོགས་ཁྲོད་"གནས་མཇལ་བ། Pilgrimage"ཟེར་བའི་འཁོར་ཐག་ལ་ཨེ་ཤ་ཡའི་འཁོར་ཐག་གྲགས་ཤོས་ཀྱི་འོས་གཞིར་བདམས་པ་དང་། འཁོར་ཐག་དེ་ཡི་ནང་ནས་“དྲན་གླུ་དང་ངེད་གཉིས་ཀྱི་ལས་དབང་།” གཉིས་ལ་ཨེ་ཤ་ཡའི་གཞས་སྣ་གྲགས་ཤོས་ཀྱི་འོས་གཞིར་ཀྱང་བདམས། གཞན་Tibetan Music Awards ཁྲོད་ནས་ཆེས་བཟང་བའི་གླུ་ཡི་འོས་གཞིར་བདམས། ༢༠༡༠ ལོའི་ཟླ་ ༢ པར་ DJ Marc Miguel of Buffetlibre རོལ་དབྱངས་གློག་ཆས་བཟོ་ཚོང་ཁང་གི་གདན་ཞུས་ལྟར་ཚིག་དབྱངས་རང་གིས་བརྩམས་པའི་“གྲངས་ཀའི་གླུ་”སྒྲ་བླངས་ཏེ་རྒྱལ་སྤྱིའི་ཚོང་ར་བཀྲམ། ༢༠༡༠ ལོར་ཟླ་ ༥ བའི་ཚེ་༢༩ ཉིན་ Seattle ནས་ཚོགས་པའི་བྱང་ནུབ་དམངས་ཁྲོད་དུས་སྟོན་ Northwest Folk life Festival སྟེང་ཞུགས། གླུ་བ་འགའ་ཡི་གཞས་མཉམ་བསྒྲིགས་ཀྱི་འཁོར་ཐག་“Roots and Branches: Live From The 2010 Festival” ཟེར་བ་ལོ་དེར་འགྲེམས་སྤེལ་བྱས། ༢༠༡༠ ལོའི་ཟླ་༩ བར་ལྷོ་ཀོ་རི་ཡའི་རྒྱལ་སྤྱིའི་ངོ་འབག་འཁྲབ་སྟོན་དུས་སྟོན་ཐོག་ཞུགས།  ༢༠༠༠ ལོར་ཐེངས་དང་པོ་དུས་སྟོན་དེ་ལ་ཞུགས་མྱོང་། ལོ་གཅིག་རིང་ལྷོ་ཀོ་རི་ཡའི་སྤྱི་ཚོགས་རིགས་གནས་དང་སྲོལ་རྒྱུན་འཁྲབ་སྟོན་ཞིབ་འཇུག་དང་ཀོ་རི་ཡའི་སྐད་ཡིག་ཆེད་སྦྱངས་བྱས།